Eine groep Tegelse jônges haet zich ingkele
jaore gelaeje tiédes de vastelaovend beejein gegooid en trooj sjpontaan op. Do mei waas Oeles Toekoms gebaore en det is nôw óetgegreuijd toet eine groep dae neet miër weg te dinke is in d’n Tegelse vastelaovend.
We sjriéve vastelaovend 1996-1997. Ingkele Tegelse jônges bouwe aan de Prinsewage. Op daes bouwplaats kômme Luuk Willemsen, Luuk de Haas, Paul Smeets, Alain Sijbers en Frank Rijvers (Aad-Oeles Toekoms leeje) op ‘t ideej öm ein act te doon op vastelaovesmaondag. De elders van ‘t mierendeil van dees jônges zaote in ‘t besjteur van D’n Oeles. Daoröm ‘t volgende ludieke ideej: ‘t viéftal beeldt ‘t besjteur óet, gans in kostuum en met muts, en met vuël flauweköl.
Nao aafloup meldt Henk Faassen (Raod van Ellef-lid) zich, en zaet det de jônges heejmei door môtte gaon. Nao de vastelaovend geit de groep eine kiër beejein zitte, en de gebaorte van Oeles Toekoms is ein feit. De groep wuërt óetgebreid met Jochem Gommans en later Gijsbert Verweij en Job Willemsen, as Nar.
Belangriékste taak van Oeles Toekoms is ‘t begeleije van ‘t Jeugdtrio. De groep deent as ein Raod van Ellef vur de Jeugprins en de adjudante. Oeles Toekoms is neet miër weg te dingke binne de Tegelse vastelaovend.
Net as ein echte vereiniging haet Oeles Toekoms netuërlik ouch ein besjteur. De veurzitter wuërt ‘Wingkvanger’ genump, de penningmeister ‘Centekretser’ en de Vors ‘Moélemeister’. Verder is t’r netuërlik nag de sikkertaris/notulis, oftewael d’n ‘Tikker’, en de ceremoniemeister ‘Waegwiezer’.
De oorsjprônkelikke groep jônges is gans óet Oeles Toekoms verdwene. As se de laeftiéd van 25 bös gepasseerd maag se gen deil miër óetmake van Oeles Toekoms; den sjuuf se op nao de Oeles Toekoms Senaat. Daeze groep besjteit intösse óet ein groët aantal minse, maar is verder neet actief.
Oeles Toekoms is eine groep entoesjaste jônges dae ‘t vastelaovend viere in ‘t blood haet, en hiel gaer deilnimp aan d’n Tegelse vastelaovend. Op 10 oktober 2008 vierde de jônges eur elfjaorig jubiléjum.
Oeles Toekoms geit met viéftiën persoëne de kômmende vastelaovend in. Wingkvanger Ruud Cremers, Moélemeister Ron Dings, Waégwiézer Jasper Luijten, Tikker Frank Rijks en Centekretser Luuk Peters gaon de groep veur, verder besjteit de groep óet Tom Cornet, Maarten Ottenheym, Romain Faassen, Freek Peters, Max Kolster, Bram Kurstjens, Luuk Haenraets, en Nar Koen Cremers. Dit onger toezich van Carlo Peters. Eure adviseurs zien Barry van den Ham en Paul Smeets..
